| ابدي بسم الله وأهديكم تحية |
|
المقاله تحت باب أدب شعبي ابدي بسم الله وأهديكم تحية جوني باشي من جبل سنجار للحلوة أم قصر
جوني باشي. من روابي دهوك لنخل السماوة لسعف والجمار واعثوك التمر
جوني باشي من أبو الحلوة هديل جوني باشي من أبو الحلوة سمر
جوني باشي من ملاك كردي اسمه سليفاني ارجع لهولير وارجع للحضر
منين ابدي ياوطن وأنت العراق وأنت منهو الماكتب عنك شعر
منين ابدي ياوطن وأنت الجريح تأن عكب مافيك وأنت المنتصر
منين ابدي ياوطن وما عرفتك شيعي سني ولا عرفت الله ما كرم عمر
وما عرفت الله ما كرم علي نعرف أهل البيت من ذمهم كفر
حاولت اكتب احبك ياعراق ونزلت دموعي على الورقة حبر
نزلت دموعي بألم فوق السطور من شفت جم جثه مشتاقة لقبر
ومن ذكرتك ياعبير وأنتي طفلة ماتت بلا ذنب مهتوكة ستر
شككت بيدي الورق واقسم يمين شما يضل بيه نفس لأحرك همر
من عاش غربة بوطن ومن بيده خاط الكفن
ومن بيده شك الجرح واحتار يشكي لمن
بيا مذهب وبيا شرع صار القتل بي فن
ويا اخو يقتل أخوه وقلب الغريب يحن
مو جان أخوك بوكت يشفي الجرح لو عن
جرحك ويهزك ألم يمك يشيلك سفن
تعبر ابحور الدمع بعيون ماضن بجن
سنيه أني واخوي شيعي من كربلا دمي ويه دمه أنعجن
وبزاخو كردي إلي وبدهوك بيتي لأن
من هجروني الفرس مارحت للأجنبي رحت لكل المدن
وبغداد بيتي تضل لوأغيب عنها قرن
أني عراقية وأخويه الأسد احمد وطه ومعن
وحسين ومحمد والكرار ويه أبو الحسن
والعاش بالمعتقل ماهمه نوم السجن
قضبان سجنك ورق سجانك اشكد لعن
يوم إلي رجله وطت ارضي وبيه اندفن
زينوا شارب بكر وهانو آخيته وسن
وكتبوا إرهابي عمر واني ضربني عفن
بس ما محو ديني وهويتي وماصاب قلبي وهن
أحيا وأموت بأرض بيها الجهاد أن سن
ارض الحسين وعلي حيث الغضنفر يئن
والأبي يبقى أبي ما ترمي رأسه المحن
ها ياعراقي شعجب ميك زلال وأسن
ها ياعراقي العرض ينتهك باسم الدين
وين الرجال التي جانت بنظرة عين
تلوي عوادي الزمن صدام ابن حسين
أهلك ياموصل علم ساري صلاح الدين
من صار زود الزلم عجنوا الدم بطين
وعاهدوا يبقى الوطن والعلم واحد يا عراااااق وما يصير أثنين
*ألقتها في المهرجان الشعري الذي أقامته جامعة الموصل الحدباء |