المقاله تحت باب  أدب شعبي
في  06/09/2007 06:00 AM
GMT

يامن بالكلب والروح حليت....
ظكت رادك واكول هواي حليت...
الك جم مشكلة ياترف حليت....
هواك المشكلة واصعب عليه....

بعيني شفته اخذقلبي وفر بي
وعمده عل الجمر حطه وفر بي
ليش الاضحك بوجهه وفر بي
من اصد عنه يحط سكين بيه

هوى الشوك الاجه منك ..... منعصار
ونخب حبك يموتني ..... منعصار
على كلبي احس منك ..... منع صار
وحظر تجوال سويته عليه

في الشوق طشرني ولمني
داء الهجر تعبني ولمني
انا حاضر تعال اعتب ولمني
ادموع عيني تسولفلك اشبيه

الدهر بس ذب عليه ونه و دمعه
وكدام الصخر ابجي و ا دمعه
بدربكم سلبو دبي و دمعه
اريد اتصل محد حن عليه

احبك من بلغ سنك ورشداك
نصيحة وياك ماتنفع ورشداك
لون اعرف شنو زعللك ورشداك
دكلي بيا حكم انهي القضية

بخيل وعندك من المال لفات
وعلى كلمن يجي ويروح لفات
الدنيا جم سبع بالكبر لفت
ويظل النذل مامور وشفيه

عندي اعيون عافني وجلك
وشخصي ما يجل احد وجلك
مرمر خالقك ربنه وجلك
وذبك يا ترف ورطه عليه

زماني وياي ما انصف بجيله
ولج ياعين بسج عاد بجيله
حبيبي اشلون صوبني بجيله
زرف كلبي وكف شامت عليه

حجلها أعله الدرج بذني تشرشال
وبديها يلوك من تصعد تشرشال
نابليون أظن جدها وتشرشال
غزت قلبي بحربها ألعالمية

وحيد انه وعليه الكوم ظليت
على اوساد المنيه اليوم ظليت
عافوني الصحابه اهناه وظليت
وصدك هل اليوم عهدك ضل اليه