المقاله تحت باب  أدب شعبي
في  10/08/2007 06:00 AM
GMT

* " تصبح على خير " نكولها هناك
من جنه ننام إحنه بوطنه

* هسه إحنه بغرب والشوك قتال
وصرنه من القلق منّام إحنه

* لذلك من يمرنه الليل نكول
نصبح على ( عراق ) يلم شملنه

* على بختك وطنه شبيك زعلان
وبعد الحرب مو جنك وطنه

* فزيت بوجهنه من إجيناك
ونعذرك ؛ الدمع غير وجهنه

* عراقيين إحنه ويشهد الله
وشمحلاها هل كلمة بحلكنه

* على بختك وطنه وربك نعود
ونطش الفرحة ويهلهل نخلنه

* واحد كلنه واحد كلنه إخوان
عربنه كراد وشيعتنه سنة

* ( أنه عراقي ) : يصيح الجبل بأربيل
نخل البصرة جاوب : خوتك إحنه



لحنت هذه القصيدة الغنائية من قبل الملحن و المطرب العراقي " سيمور جلال " و تم تصويرها ايضا و تبث حاليا على قناة القيثارة الفضائية و القيت كمقدمة لبرنامج سهرة بابلية على قناة البابلية الفضائية و بثت ايضا علة قناة الشرقية الفضائية ضمن الحفل الشعري المقام للشاعر في وسط العاصمة الاردنية عمان على جبل اللويبدة و منشورة نصا و صوتا و أغنية على صفحات اغلب المواقع العراقية و العربية الالكترونية .