| المخلّص ... الجزء الاول |
|
المقاله تحت باب أدب شعبي الشخصيات : 1- حالم 2- سالم 3- نايم 4- الشيطان 5- التابوت 6- الكفن
الفصل الاول :
(ثلاث سجناء (حالم وسالم ونايم) داخل سجن , متكون من قضبان مستطيل وسط المسرح , الايحاء بوجود محطة قطار فوق هذا السجن , حالم وسالم في نوم عميق , ونايم في حلم مضطرب ينتهي بصيحة هستيرية)
نايم : مات مات , مات الملك حالم... سالم..., كعدو كعدو مات الملك , هسه وكت نوم !! الدينه كلها محتفله , النوم لهل الكبور كعدو
(حالم وسالم يستيقضون من اثر صراخه) , ( حالم يهدئه ويوقضه من حلمه )
حالم : اكعد اكعد لو بس تبطل من هاي الاحلام جان الله خلصنه من هاي المحنه
سالم : لاتفرح عندنه ملك مايموت !! اشربلك كلاص خيبة امل وارجع ونام (يعود الى فراشه) مادام النوم لهل الكبور خلي انام !! صار النه ثلاثين سنه ميتين ومحد دافنه (باستهزاء وانكسار وهو يتغطى) مراسيم دفن تطول خمسه وثلاثين سنه !!
نايم : هذا رابع تلفزيون يخرب وابدله وصورته بعدهه عالشاشه !! خمسه وثلاثين سنه !! باربع تلفزيونات ورئيس واحد!! (يضحك ويتكلم بسرعه وبسخريه وهو يمشي بخطوات سريعة ذهابا وايابا) رئيس اقتصادي لايعتك ولايخرب منو يشتري رئيس اقتصادي مزاد مزاد ... الى كل الدول العربيه من يشتري رئيسا عراقيا معمرا مجهول النسب !! (فلاش باك بهدوء وبصوت خافت) لالالا .. (ثم يرتفع الصوت من جديد) يروى في احدى الصحف التاريخيه الموثوقة والصادرة عن مجلس قيادة الثوره بانه حفيدا للامام الحسين من يشتري من يشتري (ينتهي صوته تدريجيا و يبكي) من يشتري احلامي الفارغة (وهو يعود الى فراشه للنوم) حالم : ((مات الزعيم الزود العانه فلس .. عاش الزعيم الزود العانه فلس .. جم مره بيضت السجن .. والهسه يوسف بالحبس)) (يحني ظهره ونظره الى الاعلى ويسير ببطئ) الهي ... الهي ... الفرج , احسه الوحشه تتشلبه على حيطان كلبي , والضلام .. والضلام بنه عشه على عيوني , يمته تفرجها ياربي ؟؟
سالم : (يرفع الغطاء من راسه وباستهزاء) انته ظل يمته يفرجهه ويمته يفرجهه !! مو الله ينزل بزبيل . بابا لايغير الله بقوم حتى يغيرو ....
حالم : شيغيرون ؟ والخوف واكف بكل زويه مثل السيف .. (الصوت يرتفع تدريجيا) الخوف سيف الخوف مثل السيف ارفع راسك انته عراقي (ايماء برفع الراس) اكطع راسك انته عراقي (ايماء بالذبح وكأنه يقطع عنقه في سكين , ويسقط على الارض) اذبح طفلك انته عراقي (في وضع الجلوس , ايماء بتحريك مهد خالي) ايتم ابنك انته عراقي (ايماء لليتيم في وضع الجلوس) ارمل اهلك انته عراقي (ايماء لارمله , وضع الجلوس) انته عراقي عراقي عراقي (ينخفظ الصوت تدريجيا ويبدأ بالوقوف تدريجيا وبصعوبة) لحد مااكره انه عراقي .. (يلفظ الكلام بصعوبه ويكرره اكثر من مره) كلها عراقي .. انه عراقي .. وانته عراقي وكلهه تصرخ ماعلينه وكلها صاحت موبيدينه (يفتح راحتيه ويركز فيهما) وحتى كلمة موبدينه .. موبدينه !! هم فرضوهه علينه قنعونه الصرخه سكته وهم رضينه !! ومره ماكدرو علينه مره ماكدرو علينه .. (الصوت يرتفع وكانه يتهيأ لاهزوجه) سلحونه وكامو ايحشمون بينه !! (يترنم بها على شكل اهزوجه اي هوسه ويكررها ثم ينخفض الصوت تدريجيا ثم يرتفع يتكملة الاهزوجه : وصرنه وياهم علينه ولكن بمرافقة (ضرب الكف على الصدر) وصرنه وياهم علينه . (اكثر من مره مع ضرب الصدر) سالم : كفى كفى كفى .. كم اكره تبرير الاخطاء ان كلامك هذا هو الضعف بعينه لطالما قدمتم هذه الاعذار الخوف الجوع السيف الملك ماهذه الاعذار الفقيره التي لاتغني ولاتسمن من جوع حالم : (بعصبيه) كافي كافي الناس كاتلهه الخوف وملتهيه بعيشتهه . الناس اتريد خبز الناس تريد اتعيش , تدري الانسان شلون جاي يصير رخيص ومايفكر بس بنفسه ومعدته وبس من يصعد السـوك ايرخص الانسان يعيش السـوك غالي ويسقط الانسان .. (هتاف يكرره مرتين ثم يكمل) اضطراب المعده يعلن انسحاب الجوع وبـس الخبزه ترفع هامـة الجوعان
سالم : لا هاي الناس تتعكز عالفقر . تعلمت عالنهب والبوك وصار لحمهم رخيص واجسادهم معلكه بالسوك مثل السلع
حالم : (بعصبيه) خو انته محد يكدر يقنعك , المهم عندك تطلع هاي الناس همه المسؤولين عن كل هاي الاخطاء انته شكد ظالم !! (الهدوء يعم المكان وسالم يشعر بالحيف ويتاثر من وقع هذه المفردة القاسية) حالم : (بهدوء وكأنه يطلب السماح) ياصاحبي .. تره العوز مايرحم .. يقلل من قيمتك وينزع ماي وجهك ويخليك رخيص بين الناس .. رخيص ومثل صم فشله يبديك .
سالم : (غير مقتنع ويقول جملته بخيبة امل) بعدك اتبرر لهاي الناس ؟
حالم : (يتهجم عليه مرة اخرى) هاي الناس !! وكأنك مومنهم , دائما اتشير الهم وكانهم نكره .. هاي الناس !! هاي الناس !! ((تره الباك الوطن لو عنده بس ارغيف .. جا حط الوطن واهل الوطن عالراس والباعت شرفها بثمن صـم اطحيـن .. لـو تملك خبز جا ظلـها ماينجاس)) ها يابو المبادى والقيم شتكول ؟؟ (يقدم السوال وكانه انتصر بالادله القاطعه)
سالم : دائما تطلعني بالنهايه انه الغلطان ومن تقتنع بشي تقفل عليه
حالم : أي طبعا , انا مادام عندي امل , راح ابقه انتظر .. وصوت القطار على جيه , وصاحبي لازم يجي ويخلصنه من هاي المحنه
سالم : هذا تفاءلك عجيب وحجيك عن الامل والضوه الجاي من بعيد مدري وين راح يودينه , (بعصبيه) ولك مومليت من هذا السجن وكلبي راح يطك (تظهر اضاءه متحركه ويصاحبها صوت قطار عالي , الوجوه تترقب وتنظر الى الاعلى , ثم يختفي الصوت والاضاءه) سالم : (بفرح شديد) ها بشر هو ؟
حالم : (يتامل لفتره) لا موهو انه اعرف صوته سالم : (اجواء الياس من جديد) اوه... موكتلك مايجي ؟؟
حالم : انته ليش ماعند صبر (ينظر الى ساعته ويتحرك بهستيريه ذهابا وايابا) هسه يجي هسه يجي هسه يجي هس... (يسكت لوهله ثم يستدرك) انته ليش ماعندك صبرهسه يجي .
(في هذه الاثناء نايم ينهض منزعجا من نومه ويقاطعهم بصوت عالي)
نايم : بس ... خلوني انام , شنو هذا الكلام الفارغ الي لايقدم ولاياخر (ينهض وهو يرتجف ويتمشى نحوهم ويتكلم مستهزا) الله يفرجها ابنادم يفرجها , شوفو البرد اشسوا بطرافي (الاطراف ترتجف) شوفو الرطوبه ماليه المكان (وكانه ينظر الى السقف بحذر) .. ((تنزل رطوبة الذله من السكوف)) .. وخنكه خنكه بلا نفس وبلايه حس!! (يديه على رقبته وكانه يختنق) وحتى الهوه .. ((وحتى الهوه خربان بايت من امس)) !! (ثم يسرع نحو القضبان وبصوت عالي) هوه هوه هوه هوه (حتى ينتهي صوته , يسارعون اليه ويجلسوه ويعطوه قدح الماء , يشرب قليلا ويضحك حتى يسيل لعابه مع الماء ويتكلم مستهزئا) الماء , الماء سر الحياة (يبكي) ليش هي هاي هم حياة حالم : كافي شنو هذا التشائم باجر نطلع !! باجر نشوف الشمس .. والدنيه تمطر ضوه وباب السجن ينفتح .. ونضوك طعم الهوه اخ لو بس مثلي شايفينه وسامعين صوته جان ما وصلتو الهاي المرحله من الياس
نايم : اوف .... بعدك على هاي القوانه القديمه والله خبصتنه يوميه تعيد هاي السالفه انته ابقى باحلامك وانا ارجع انام احسنلي (وهو متجه نحو الفراش يتغطى ويقول) كل واحد يمد رجله على كد غطاه , احلملي حلم على كدي لان هاي احلامك راح توصلك الحبل المشنقه (حالم يضع راسه على القضبان ويبكي وبصوت منكسر, وسالم يضع يده على كتفه) حالم : والله شفته .. والله كلي اجي .. وهوعمره ماخلف بوعده
سالم : انا مصدكك , بس هاي المحطه فوكنه وصوت القطار كلساع يخترقنه مثل السيف وصاحبك ماكو ؟ (يبتعد عنه و يرفع حاجبه بمكر وكانه وصل الى مرحلة من الياس وبدأ يسخر من صاحبه) صاحبك هواي تاخر واعتقــد .... ؟
حالم : يااخي .. الغائب عذره معه , وانا متاكد من مجيئه , فلابد للمخلص ان ياتي (صمت لثواني , ينظر الى البعيد) الله !! لاتتصور كيف اتخيله وهو قادم على حصانه الابيض ومن وراءه موكب كبير (يرتف الصوت تدريجيا) يدخل على المدينة كالفاتحين , ينثر فوق روؤس الناس بذور الثوره في ضل الحسين اجتمعو الثوار وبضل شجرة الطف زرعو البذره بذرة كربله يسكيها دم السيف تخضر طف جديد وتنولـد ثـوره (صوت القطار مرة اخرى والوجوه تترقب اكثر هذه المره ثم يختفي الصوت) سالم : (يتفاءل من جديد) ها , هو ؟؟ حالم : (بخيبة امل) لا موهو (صمت لثواني) بس صدكني يجي اه لوبس يجي !!
سالم : انته هواي عشت وياه بالسجن احجيله عنه ؟؟
حالم : أيــه ... (يشعل سيجاره وياخد نفس عميق ويعطيها لصاحبه) والله مادري شكول كون عندي السان شاعر ووصفه الك (موسيقى حزينه) جان رغم ضلمة السجن يشع مثل الكمر ( ينظر الى كفه والاصابع ترتجف) ويمسح الضلمه بصابيعه ضوه كله ابيض وجهه لحيته ملابسه جنه ملاك من السمه ينكط ضوه , جان ما يسمينه باسماءنه !! جان يكلي حبيبي .. حبيبي وجنت من اسمع حبيبي تحط عصافير اعله شباج السجن سوه السجن حديقه وجنه مأمنين بسده , تخيل بالسجن ويصلي بينه جماعه ومايخاف
سالم : (باستغراب شديد) معقوله الشيطان موجود , ويصلي بيكم صلاة الجماعه بالسجن !!
(يدخل صوت الاذان بصوت واطئ ثم يرتفع تدريجيا , حيث يسرع حالم ليوقض نايم من نومه)
حالم : خلي نصلي صلاة جماعه , من نتوحد يجي ويخلصنه !! واذا نضل مفترقين مايجي ؟
(يتوجه الثلاثه بخط واحد الى القبله , حالم ونايم جنب الى جنب(مسبلين الايادي) , وسالم وحده (متكتف) يبعد عنهم مسافة نصف متر او اقل بحيث تسمح لمرور رجل من خلالها , يبدأون الصلاة .. الله اكبر الله اكبر بصوت مسموع واحد تلو الاخر, بعد لحظات من الصمت يظهر الشيطان من خلف القضبان متسللا ووجهه يملئه الغضب وبيده سوط , يدخل بين صفوفهم بحركه بطيئه تموجيه (من خلال المسافه القليله الموجوده بين الاثنين والواحد) يرونه ويتفرقون ويتراكضون بحركة بطيئة نوعا ما , واذا امكن ان يكون هروبهم بتسلق القضبان اويختبئون في زوايا السجن وكانهم يصيحون ولاكن بدون صوت , يصاحب الفزع اضاءه خافته متحركه واصوات مخيفه وموسيقى مخيفه , بعد لحظات تذهب الاصوات وتعود الاضاءه الطبيعيه , الشيطان بصوت عالي ضاحكا ومستهزئا)
الشيطان : حسبالكم يجي (يضحك , هه هه هه) والله الي اشوفو يصلي جماعه اطرو بالنص تردون تتوحدون ياكلاب يله رجعو نامو (الكل يزحف بسرعه ويحاول ان يصل الى فراشه , فيصيح بهم مرة اخرى ) تعالو تعالو كلاب تردون اتصلون ؟؟ تعالو .. اوكفو (يقفون بانتظام بخط مستقيم بحالة الاستعداد) انا موافق تصلون !! ( يتهامسون بينهم معقوله معقوله ) بس بشرط ان تكون صلاتكم على ملتي وديني وحسب تشريعي (الكل باصوات متفرقه نعم نعم أي موافقين المهم انصلي) اذن على بركة الحرب , (يشير بيده باتجاه معاكس لاتجاه القبله) توجهو على قبلة الجبهه (يقف الجميع بخط واحد بعكس اتجاه القبله , يتجرأ حالم ويسال بحذر شديد) حالم : منو راح يأذن ويقيم الصلاة الشيطان : اتركولي موضوع الاذان انا أأذن واقيم الصلاة .. ((هبل اكبر هبل اكبر اشهد اني هبل اشهد اني هبل اشهد حكمي للازل حي على لون المسه حي على سبي النسه حي على ذل الرجل حي على قتل الطفل (يرفع الصوط) قد قامت السياط قد قامت السياط انا اكبر انا اكبر لا الله الا انا)) (يبدا بجلدهم بالسوط على ظهورهم وهم في حالة ايحاء للصلاة من تكبير وركوع وسجوع ورفع اكف الدعاء واجسامهم تتموج من شدة الالم) كفى انتهت الصلاة , وتقبل الشيطان (يصافح الثلاثه واحدا تلو الاخر بجملة تقبل الشيطان) كفى لقد انتهت الصلاة وقد تقبلت منكم , الان جاء دوركم في الدعاء ساعطيكم الامان , ادعوا ربكم الذي تزعمون كما شئتم
حالم: (يتجرأ من جديد وبصوت خائف) صحيح ياشيطان ؟ هل ستعطينا الامان لندعوا ربنا كما نشاء دون ان تطعم لحمنا لكلاب قصرك
الشيطان : نعم ولكن بشرط
ماهو : (بفضول) ماهو الشرط ياشيطان
الشيطان : ان يكون دعائكم جهرا وليس سرا
نايم : ها ها (يضحك ثم يدرك انه في حضرة الشيطان , فيسكت بسرعه ويترك الضحك ويقول) هل هذه مزحة !! ام انك تريد ان تتفنن في تعذيبنا وتقتلنا ببطء .. بماذا يفيدك دعائنا جهرا ؟
الشيطان : (يضحك بمكر) اولا : لاني لاأؤمن بذلك الرب الذي تدعونه من دوني , واعرف انه لايملك لكم ضرا ولانفعا وثانيا : (يتأملهم للحظه)عندما تدعونه جهرا ساعرف على الاقل ماذا تحمله سرائركم من ضغينة ضدي
(حالم وسالم ونايم يسيرون ببطء وبالتسلسل ويقفون باتجاه القبله ويتقدمهم حالم ليقرأ الدعاء وسالم ونايم يقولون امين) حالم : ((اللّهمّ اهدنا في من هديت وعافنا في من عافيت اللّهمّ تقبّل منه صلاة الفجر ان كان توضّى بدموع الأيتام وعلّمه الأتكيت الأسلاميّ بأن يخرج من جيب السترة عيدا للأطفال اللّهمّ وعلّمه أن يصنع كرسيّ الحكم من الخبز فاذا جاء الفقراء اليه يعطيهم كرسيّ الحكم وندعوا الله اليك بان لا يورث أطفالك حكم الشعب أو يجلس واحدهم فوق الكرسيّ ( الأربسك ) سحر ( الأربسك ) سينسي الحاكم أطفال الشهداء وآخر دعوانا يا ريّسنا : ياربّ يا مقسّم الأرزاق لا تجعلنا فقراءا كي نعمل بل أزرع فينا حبّ النخلة وأجعل حاكمنا جوعانا . . . كي يعمل !! وندعوا الباري عزّ وجلّ بأن لا تجلس يوما فوق الكرسيّ الجلد الدوّار فتدور أمور الشعب عليك يضيع الأمر عليك وتدعوا رائحة ( الجلد البشريّ ) – جلد الكرسيّ - أنياب الثوّار))
الشيطان : ( يختنق وينزعج من ذكر الثوار) كفى كفى لااريد ان اسمع المزيد , الثوار تبا لهذه المفرده التي تدور على عنقي مثل حبل المشنقه لااريد ان اسمع مثل هذه الكلمه بعد اليوم (يفكر بصمت ثم يستدرك) ام انها اشارة استغاثه لصاحبكم , تريدونه ان ياتي لانقاذكم (يمسك اذن نايم ويسحبه , حالم وسالم ينسحبون اوتوماتيكيا بنفس الطريقه بدون ان يلمسهم ويكون تحركهم متوازي ومتشابه عند دفعهم وعند سحبهم) لقد اعطيتكم الفرصه ان تدعوا الاهكم كما تشاؤون ولكن ان تصل بكم الوقاحه وتهددوني بسلاح الاهكم , انا اعرف جدا ان سلاح الرب هو الثوار , اتركوا هذه المفردات السخيفه الثورة البنادق الثوار واخلدوا الى النوم (يزجرهم) هيا هيا .. والله ليكوم اروح افلش بيتو بالقادفات وخليه عبره لغيرو (الكل يسارع الى فراشه والغطاء يرتجف من الخوف ينسحب الشيطان وتطفى الانوار , ايحاء للنوم , ثم تظهر الاضاءه على نايم فقط , وهو مختنق في كابوس حيث يستيقض منه مرعوبا ليكلم حالم)
نايم : حالم حالم , ابريني الذمه مساع تجاهلتك وماصدكت كلامك , توني شفت صاحبك بالحلم
حالم : (اضاءه على حالم , يرفع الغطاء من وجهه بسرعه) شفته ؟ حجيت وياه ؟ كلك يجي ؟ احجيلي ؟
نايم : لا بس حلمت حلم مخيف جني بمكبره والوكت موحش , ظلمه وماشوف بس تابوت وجفن (الظلام يعم المسرح , هنا ينتهي الفصل الاول)
الفصل الثاني :
(التابوت والكفن في مقبره وسط المسرح , التابوت على اليمين والكفن على الشمال , يفتح التابوت في بطئ , تخرج الشخصيه بهدوء , يعطس ويخرج وهو يرتجف من البرد)
التابوت : برد , برد , حضني بارد .. كلساع موت وحظني بارد مية جثة تمر على اعضامي ثلج .. انه بعازة ميت يدفيني الموت صاير باهت ومابي طعم .. محتاج ميت هيبته تغطيني نريد ميت بيت اجروح .. نريد ميت بيت اجروح (هنا يضع يده على حاجبيه وينظر الى البعيد وكانه يبحث عن ضالته) نحني جف المكبره من اجروحه .. (ثم يجلس على الارض وعلى ركبتيه ويقول بانكسار) وين الكالي ميت رايته بروحه .. وين الكه مزاج بكد خلك تابوت .. وين الكالي ميت حضنه مرجوحه (ينهض ويمشي مسرعا نوعا ما) كل اسباب الموت صارت مالوفه , وكله الموته تجيني غصبن عليها مشيوله على جتاف القضاء والقدر . ( هنا يرتفع الصوت ويتكلم بسرعه) ماكو ميت يجيني بارادته وبرضاته ماكو جروح , ماكو رصاص , ماكو ثار , ماكو خلود آ... ه ضجت من طولي وكل الموته صارو كصار عليه . ماكو ميت على كدي .. محتاج اكدرلي شهيد بطولي اه لو الكه شهيد بطولي .. أي .. ( وكانه يتذكر ويستدرك ) بس الشهيد يغطي طولي . وحتى صرت استحي من الكاع !! ومسكينه المقابر!! يوميه ازتلها جثه عطشانه .. والكاع كاتلها العطش وبغير دم الشهداء ماترتوي
(ينتبه الى شمال المسرح وتقع عينه على الكفن فيسرع اليه ساخرا ضاحكا ويحركه بيده)
التابوت : كفن .. يا كفن يامن ليس لديك رواج في سوق البزازيين (يضحك ضحكة خفيفه وبسخريه) من يبتاعك ؟؟ هل يوجد في السوق قماش اخر ارخص منك ؟؟ وجهك ابيض .. فعلام يقابلك الانسان بقلب اسود !! ليش كل هذا الكره (بعصبيه) ليش كل الناس تكرهك ؟؟ وليش الناس ماتحب وجهك الابيض الحلو (يسأل) ياجفن محد يشتريك (يجيب نفسه) طبعا محد يشتريك اكو واحد يشتري موته بئيده (يستفزه ويحاول كشف الغطاء عن وجهه , ويسترسل بكلامه وباستفزازه بسحب الغطاء تدريجيا) دائما تنفرض على الموته محد يلبسك بارادته , اه انت نذير شؤم بل انت خارطة الموت التي تودي الى القبر (الكفن يئن من شدة كلام التابوت , والتابوت يزيد من حدة كلامه) طبعا لاتحتمل كلامي , من يشتهيك وانت سمسار جيد , تعمل لدى موسسة الموت المفاجئ , ياصاحب الموت المفاجئ الم تلامس باصابعك البيضاء جسدا للموت المتوقع , اه لو تجرب وتلامس الاجساد النابضه بالحياة وهي تتحدى الموت بجسد حي (هنا يختنق الكفن ويرفس بيديه وبرجليه الى ان يكشف الغطاء عن وجهه , التابوت يرتعد من شدة الخوف ووينسحب الى الوراء)
الكفن : (بصوت عالي)بس بس (يتفاجا التابوت ويرتبك من ردة الفعل) انته شتعرف عن الاكفان وجاي تتهمني باتهامات باطله , اتريد تسويني شماعه وتعلك عليه اخطاء الجبناء , الذنب موذنبي , روح اسال الناس ليش خايفين , عبالك انه مرتاح وانه جاي احس نفسي عبأ ثقيل على الناس .. جاي ادورلي بطل اتباهه بيه يشيلني وهـو عدل بمتونـه كبل لايسشهد اتلفلف عليـه حتى من يطيح اطيحن دونـه وانزل وياه للكبر لازم بديـه واغسل الوحشه بدموع اعيونه (يقرأه باكيا) (يصمت قليلا ثم يستدرك) كبل جانت الناس تعرف قيمتي ويعتبروني رمز للبطوله , كبل وينك يا كبل تعال , تعال وشيل الخوف , هاي النبته المريضه , الي جاي تكبر بكلوب الناس (يسكت لوهله ثم يستدرك) محد يعيش الحياة الابديه ؟ اذا مايضوك طعم الموت وهو عدل !! اذا الشعب يوما اراد الحياة فلا بد ان يؤمنوا بالكفن (بصوت عالي ولاباس من تكرارها اكثر من مرة) انا بحاجة الى رجل يقف على اطلال كربلاء , ويحاول ان يعيد تجربة الطف !! حتى ولو بشكل مبسط (يرتفع الصوت تدريجيا) نحن بحاجة الى طف جديد الى رجل جديد الى عالم جديد (صراخ) جديد جديد .. (الظلام يغطي المسرح , هنا ينتهي الفصل الثاني) |