يصفه امخلبص ابليس ويبرمه الكور
واحنه الماعرفنه بياغزل نصفه
مخاشر علوشايع كل وشيعه بلون
وطويات المغازل بينه مختلفه
كل طويه ابنبيبه ولو صفينه انطيح
من حايچ لحايچ كورنه انگطفه
گام النه وخطف وين البعد بيه زود
والكذله نثرهه وغازل ابزلفه
يصك با ثنين اديه المدرع الرد ليه
يشگ اموسطه ويلتم عليه طرفه
مثل الصل زرگنه وصرنه نفخة بوه
نشاگف والوگع مايسلم الهفه
..............................
كل عشره اعله بيدر والحصاد اركاب
والمنجل يحوش بهمته وعرفه
غدت شبه النثار بزعل صك السيف
وهوسات الحصاد اعلينه متحلفه
ياتالي الرشن ماروت بيك الگاع
واترف گاع عدنه ونحصد ابحلفه
................................................
لون الناس واحد واحنه مية لون
من كل شكل طينه وكل شكل نطفه
نطلگ كل وكت مثل المعسره انصيح
ومن يوگع حملها الوادم اتخطفه
متعلم دمعنه بلا بواچي يسيل.
.مثل روج الشواطي اشيصدف يكرفه
كافر يادمع چم ضحچه ماتت بيك
من صامت الفرحه وكفرت الشفه
نگصد ياشريعه ونعبر الياصوب
من هاج البحر وانخسفت الگّفه
عين اعله الغرگ عين اعله حال احسين
والباشط ابنحره وناس متصلفه
البحر ماينگطع دم وعلانه الروج
والغركان ظل يرافس ابلهفه
عليمن هالذبح يالتذبح بكل عيد
ولك ذبح الليالي السود ماكفه
لويدري الحسين الثوره هيچ اتصير
ماضهضب بسيفه وچا ذبح طفه
وچا عباس عافه وساوم ابن ازياد!
وچا شال الفرات وماكطع چفه
وچاهلهلت رمله الجاسم العريس
وبارض الشام سوت للولد زفه
وچا عبدالله طار ورفرف اعله الماي
مانحره انگطع ومگمطه ايچتفه
ماذلت سبايا وزينب ابها الحال
چا ردت لهلها وكل طفل يغفه
كسرنه احنه السيوف وعفنه الف احسين
ينزف كل وكت والماگطع نزفه
عوجنه اسيوفنه بهامات ألامصلين
وابن العاص رد وحزب ابصفه
أمرادم لوگعدنه ولو وكفنه نطيح
ولامذهبنه صفنه وصرنه فد وگفه
چم بيدر حرگنه وهودج وصيوان
من مات الضمير وماتت العفه
......................
عرس گالو عرس ودفوف تالي الليل
بردوا والسيوف بكل نحر تدفه
كل عثرة جدم زفه وبطل مطبور
واجلاف الحجاز بكل وكت زفه
عليمن هالذبح وابني واخوك ايطيح
والمن هالشجاعه وشنهي هالوگفه
مشيتوا اويالسبايا وكل رمح بي راس
ردتوا الجائزه من الظالم وعطفه
يزيد الروس گصها وكافئ المچتول
ومثل حصة شمركم هالحصص تصفه
لو گمتوا وصفيتو وصرتوا فرد حزام
چا مارد يزيد ويصفج ابدفه |
