يا علويه.. ردي عليّ
خلف الباب كليبي خطيَّ
روحي تولعت
بس
شويه.. شويه
يا نسمات عيوني الطافت بين عيونك
ردت تحسس نهداتك
يمكن جَنْهَّ إتوَلْعَتْ بيّ
يا علويه
مجنون آنه ..
لو أنتِ أنجنيتي بيَّ؟
من شفتك بعيون الكمره..
خطواتك رقصة حوريه
وأنت ولا جنكْ يا عيوني
ما تدرين..
ورد خدودك فوح عطره
من مبسم شمس الصبحيه
يا علويه.. شنهو النيهَّ؟
أدري الفارق بيني وبينك
موكد يلهث وسط ضلوعي
وصرخاته بروحي إل ما تهدأ
تتمنى اتشم أطيب أزهار البريه
وانت الممراح السواح إبكلب طويره
نظراتك ياضيْ عيوني ادولب بيَّ
يا علويه
طعم شفافك حلم أوجاعي
شهوه وترعش..
هيمانه بصرخات الريه
يا علويه
شنهو..
وشسويتي بيَّ؟
من طبيت إبعتبت بابك
تَقْوّى وخوف وخلوة رأي
كالت ليَّ..
سبحان الخالق ها النحله
نثيه وتسبح..
عريانه بنور البريهّ
وأنت الورده
وهذا الحبك..
سهران يلحن بأشعاره
شلون إيرسمك
وبيا صوره
تضْوّين انتِ
وجنك شمسه
أو طلت إشراق على الدنيا
من بوح اطياف الصبحيه
يا علويه
آنه خطيَّ
يا معوده موكافي مداره
آنه طوَّيْب
وآنه حبيب
ومن سكوتك
كلْ الناس اتشمتت بيَّ
يا علويه شنهو الجاره؟
يمته عيونك
أتفك أسراري المحتاره
تستعصي الهمه وما تندل..
إبيا حجه، وبيا حيله، تروم اطيافك
شوفي الوحده أشسوت بيَّ
من بعدك يانور عيوني
إلوحدي بها الدنيا الغداره
كل ظَّني تزفين الفرحه
لعيوني الظّلت منسيه
يا علويه
ماجنت ادري هيج الحب ايدولب بيَّ
شوفي صدودك
مثل النار الما ترحم شبت بعيوني
ظليت ملولح بأفكاري
مجنون وداير بأوجاعي
وكل الناس تشير عليَّ
هذا الشاعر..
شك هدومه
وتايه بدروب العلويه
*العلوية:
المرأة التي تنتمي الى العائلة التي تأتي اصولها من شجرةعائلة الرسول محمد "ص".
فالرجل يكنى بالسيد، والمرأة تكنى بالعلوية
j.kamal@hotmail.co.uk