احس دگة گلب من ارد اخط احروف
وكو حِس بالكتابه وعين تقره الحب
وكو ضحچه حنينه وضحچه كلهه احزان
وياضحچة فرح متخفيه من اتهب
وأنه ادري حنينچ من زمان اوياي
حرت خاف الگلب خادعني ظل يلعب
وتانيت الصبر دگ بابي نص الليل
وفززني بوكاحه وگلي گوم اكتب
چن روحچ بعيده وعني ماتلاح
وأحس شوفچ سراب واركض واتعب
على گد مابچيت ودمي جف وياي
وگعت وما دريت بروحي متصوب
ولن طيفچ اخذني ويسري يمچ غاد
وأنه ابدار الغرب يمعوده متغرب
دليني الدرب لو كله شوگ وموت
اوصل بالحنين وداعتچ والهب
ماشفتچ بعد بس دحچي من طرواج
وياعين التوصفچ بالقلم تكتب
شوّصف بيچ وچ وصفچ يعجز الروح
والراد اليوصفچ بالشعر يچذب
لأن كلچ شعر طبع الشعر موزون
وياوزن القوافي اعليچ متجرب
احبچ لو شبت لو وصّل العمرين
وذا ماشيّبت ظل ظهري متحّدب |
