طالع من بساتين الخمر
رّيان , وملوّن بماي الفاكهه
بيدي عطر ,ﮔد ماعطر مبحوح
فوﮔاي , ووراي اتزفني شمس المغرب الترفه ,
وعرس قداح ,
ازهار ,
وعصافير
ومطر
والكاس بيدي اغلى من عرش الملوك
اعيوني فرحه امغمضّه
وشي يضحكلهه .. وبيها يضحك
والضوه منها ويضوّي الاخر الروح
نهايات ,وبدايات , وسموات وهوى مفتوح
تعتعني السكر, ماادري دربي امنين
تعبان .. وأحس واﮔف
واحس مدري منو يمشيلي
أمشي.. وﭽني ممحي من الملذّه
وﭽني امشي اثنين
أمشي ابين غصنين
ووردتين
وندايين
وطراوه اتشيلني
واخرى تهدني بعرس شالات
وأغاني ونهر يمشي بنهر ..ويروح ليوين ابغنج
اتمرجح...
ودربي اهناك يشرد , مره ﻴﮔرب
مره مدري ويامن ايسولف...ولنّه الورد كله ايطل
على دربي ويسد باقي الدرابين
اتمرجح .. وﮔلبي بنجمه مشدود
واليّ  , ويمي ملتمين من كل زمن عشاگ وسكارى وأنبياء , وأزمنه
وحانات وابساتين
أيام وشيوخ الكو ن
)الجنيد .. المسيح وبوذا ( ملتمين
زهره من السكر تطلع على روح الاصحاب
اتضوّي ليل الدنيا
..............................
..............................
لويدرون شنهو الخمر.. ماحاربوا
ماشالو اسيوف وعادوا
وماتوا
ولاراحوا على خيل العواصف لاخر الدنيا .. ولاحقدوا
ليالي الخمر .. حب
حبّوا
اليحارب نشوتي مو دين
السياسين
لوما اغبياء وحيل وهمانين
ﭽﺎ عافوا كراسيهم , واجوا للكاس
ﭽﺎ.. صاروا صدگ ناس
حلوين  ,
ومحبين  ,
واهل كيف , ولطف
ماحفروا , ولاسووا زنازين
لاعذبوا ,
ولاشالوا سجاجين
لو ..بالخمر
ﭽﺎن الموت من كثر الملّذه ايموت
ماشفنا دواليب الالم والدم
ولاقصر النهايه
اولا قطار الموت
ﭽﺎن الروح حلوه ,اتذوب مثل التوت
ﭽﺎ ..صار الحجي عكس الاذان ابهمس وبّسكوت
ﭽان الفرح يضوي بكل ﮔلب ياقوت
22/07/2009