صدام انخلق أعتقد سهوا
أو فلته انخلق أو هو أوهام
إذا تحلم تكره بحلم فد يوم
بس يسمع بحلمك طكك اعدام
واذا ذبانه بماعينه تطيح
أحلفلك سبب طيحتها صدام
من تدور الأرض كالولنه يصير
نهار وليل وتكون الأيام
أشو عدنه الليل يبدي من الصبح ليل
معقولة الأرض دورتها أوهام
ومدام الليل يبدي من الصبح ليل
شما ننتخب حارس لازم ينام
ولو عدنه أكو نيام واعين
بس ياحيف أكو واعين نيام
وعدنه اسلام اكو وماكو مسلمين
وعدنه شكد مسيح وجنهم اسلام
وعدنه بالوطن قله اليصومون
بس العوز خله هواي صيام
وحربنه ويه الزمن ننطي الوجه وين
شما نلبد وره هم احنه كدام
وحربنه ويه الزمن مو بس مصيبه
المصيبه اللي يطيح تدوسه الاقدام
ونصفك لليكطعون بالروس
ومن يوصل سرانه انصيح ظلام
وميهم لو جثث فوك الثرى انطيح
كلشي ولا تطيح ويانه الاعلام
معدومة الثقة وصلنه الى حال
حتى الظهر ظل يشد بالحزام
وأخاف يمر علينه بهل وطن يوم
طيور الحب علينه تسحب أقسام
بعهد صدام جام البيت مكسور
ومن البرد ليلك ما تنامه
هسه البيت زين وصار بيه جام
بس قلب العراق انكسر جامه
الكراسي كاعده فوك الكراسي
لإن ماكو زعيم ولا زعامه
ذلة بذلة نكضي الليل منام
والصبح بالمدرسة ندرس كرامة
والدنه الوطن بابه نسميه
أشو بابا عدل واحنه يتامه
ممنوع التجول يا وطن بيك
لإن حته الدرب ساحب اقسامه
وشمل منع التجول حته العظام
والدم ما كدر يمشي بعظامه
عجيب شكد أيمه يا وطن بيك
و وجهك للرحم ما بيه علامه
عجيب وبيك أبو فاضل العباس
وعندك جف ولا عندك شهامة
انته بروفسور بقبض الارواح
وعزرايل الك دنك الهامة
يومية قيامة يا وطن بيك
اذن كلش سهل يوم القيامة
شجاك تسودنت يا وطن شنهي شبيك
بيك اليمه كلها وشعبك يعاني
الطايح منذبح والوكف هم مذبوح
ما تعرف المجني عليه من الجاني
منصوبة الجوادر ما رضت تنشال
شما ينشال جادر ينصب ثاني
و دفانة شكثر ما كاموا يلحكون
حته العدل يصرخ وين دفاني
ومراجيح المدينه ما كو بيها حبال
وأطفالك خطية لعيدك اتاني
كسروا باب قلبي لعيدك متانين
وطلبه هدومهم واحد من الثاني
وتدور السنه وراس السنه مكطوع
وما ينولد عيسه ومريم اتاني
وعيدك لابس أسود يمشي وي عاشور
ايد بإيد واحد كاض الثاني
علكتك حرز برداني من الخوف
بعدني ما خفت عتيتلي رداني
وكتبت اسمك طلاسم تطرد الشيطان
ومشه الشيطان عني وصرت شيطاني
بنص خارطة قلبي انته الك عنوان
بخارطتك أدور ماكو عنواني
إذن واجب علينه نغير الأسماء
تصير انته المواطن والوطن آني
وخندور وطن يا وطن آنه وياك
بس مو ألكه مجان وتاخذ مجاني
من كد ضيجتي شكبرك وأشوفك خيط
وأصيرن زرف أبره وتغفه بأحضاني
انته أكبر وطن واصغر سجن بالكون
والمسجون آنه وانته سجاني
وينشدوني عليك شلونه وضعه وياك
وأكلهم مو طبيعي هواي داراني
وتطردني من أدك بابك واكل للناس
طار من الفرح لمن تلكاني
إشطبتني من سجلك وآنه أكل للناس
نقلني من سجله لقلبه وداني
احركت روحي ضوه من مر عليك الليل
بس صار الصبح بلت عله نيراني
وبيني وبين نفسي كت وطن مكروه
ما طلعت ثكيلة وعوجت لساني
وكالو شلع قلبك كالو باك عمرك
كالو عدم أهلك ؛ كلت يعني شصار
شكو بيها اذا محبوبي شاقاني
وترس ذاني سمعتك كت علي مكروه
وأكل لأهلي الوطن محبوب سماني
وترس ذاني سمعتك كت علي جاسوس
وكلت بويه الوطن ناطور خلاني
وترس ذاني سمعتك كت علي مو زين
سمعت ( الزين ) بس والـ( مو ) تعداني
وترس ذاني سمعتك كلت خائن هاذ
وكلت ما كال بس تسمع غلط ذاني
انته لو وطن ليش آنه ضايع بيك
وأفرض ضايع المفروض تلكاني
|
